Wasiirka Wasaarada Caafimaadka iyo Daryeelka Bulshada Xukuumada Federaalka H.E Dr. Ali Haji Adam oo ahaa shir gudoonka kulan weynaha 70-aad ee Hay,adda Caafimaadka aduunka WHO/EMRO ee ka dhacayay magaalada Qaahira ee dalka Masar ayaa soo xeray kulanka 70-aad ee WHO/EMRO.
Kulankan oo ay kasoo qeyb galeen Wasiirada Caafimaadka ee dawladaha ku midoobay Xafiis goboleedka EMRO, agaasimaha Guud ee Hey’adda Caafimaadka aduunka Dr. Tedros, agaasimaha guud ee xafiis goboleedka EMRO Dr Ahmed Almandari, Safiirka Soomaaliya ee Dalka Masar Danjire Ilyees Sheekh Cumar, madaxda Hey’adaha Qaramada midoobay ee ka shaqeeya arrimaha Caafimaadka iyo marti sharaf kala duwan ayaa waxaa diirada lagu saarayey ka hortaga Cudurada faafa, talaalka Caruurta iyo daryeelka Hooyada & dhalaanka si loo helo bulsho Caafimaad qabta.
Wasiirka Caafimaadka Xukuumadda Federaalka Soomaaliya oo la wareegay hogaaminta shirka ayaa tan iyo intii uu socday madasha ka jeedinayey warbixino dhinacyo badan taabanayey oo ku saabsan muhiimada ay u leedahay u diyaar garowga xaaladaha Caafimaad ee deg dega ah iyo sidoo kale xakameynta Cudurada faafa, isagoo gunaanadkiina ugu baaqay wadamada ku bahoobay Urur Goboleedka EMRO in ay iskaashi iyo wada shaqeyn kayeeshaan sidii loo tayeyn lahaa adeegyada Caafimaad ee ay Wasaaradaha Caafimaadka bixiyaan.
Dhamaan Dowladihii iyo Ururadii ka soo qeyb galey Kulan waynaha 70-aad ee Hey’adda Caafimaadka Aduunka WHO/EMRO ayaa bogaadiyey sida Soomaaliya sanadkan u hogaamisey madasha iyadoo Wasiirka Wasiirka Wasaaradda Caafimaadka Xukuumadda Federaalka Soomaaliya Mudane Dr Cali Xaaji aadan uu shirka u gardaadiyey hanaan cajiib ah oo sababtey in dhamaan Dowladuhu amaanaa Soomaaliya.
Wasiirka Wasaaradda Caafimaadka Xukuumadda Federaalka Soomaaliya ayaa ugu dambeyn la gudoonsiiyey Bilad uu ku mutaystey hanaankii uu u shir gudoomiyey Madasha iyo maamulka guud ee shirka oo sanadka Soomaaliya ku guuleysatey hogaanka madasha.
Wasaaradda Caafimaadka iyo daryeelka bulshada Xukuumadda Federaalka Soomaaliya waxaa ka go’an helitaanka Caafimaad dhamaystiran oo tayo leh islamarkaana ka hirgala guud ahaan dalka si loo gaaro yoolka dowladda ee hagaajinta iyo xoojinta nidaamka Caafimaadka Soomaaliya.
