Wasiirka Wasaraadda Caafimaadka iyo Daryeelka Bulshadda HE. Drs Fawziya Abikar Nur, ayaa furtay kulan 3 maalmood ah kaas oo ka dhacaya magaalada Nairobi. Kulankan ayaa ah baaq ku saabsan wax ka qabashada cudurka dabeysha nuuciisa 2aad oo ka dilaacay gudaha dalka Soomaaliya. Wasiiradda ayaa isla goobta kulanka ku saxiixday baaq ay u dirtay daneeyayaasha Caafimaadka Soomaaliya oo ay goobjoog ka ahaayeen Hay’adaha @WHO, @UNICEF, @BMGF, @CDC.
Wasiir Fawziya ayaa tiri “Iyadoo lagu jiro xaalad abaareed oo ka jirta dalka oo idil, isla markaana laga soo kabanayo dhibaatadii Caabuqa COVID-19, hadna daneeyayaasha Caafimaadka dalka waa inaysan ilaawin sida ay muhiimka u tahay in la xakameeyo cudurka dabeysha ee socda si uusan u sii faafin oo uusan saameyn ugu yeelan noloshii carruur badan Soomaaliyeed,”
Wasiir Fawziya ayaa sii raacisay “Munaasabadan awgeed, waxaan jeclaan lahaa inaan mahad-naq balaaran u jeediyo dhammaan bah-wadaagtayada, iyo deeq-bixiyeyaasha, dadaalka baaxadda leh ee ay u galeen sidii malaayiin caruur Soomaaliyeed ah looga ilaalin lahaa cudurka dabeysha sannadihii lasoo dhaafay.”
